Disonancias é o reflexo audiovisual da indagación na provincia da Coruña sobre o son que nos rodea –a “banda sonora das nosas vidas”– como parte da nosa contorna, do noso patrimonio cultural, do que como sociedade somos, da memoria do que fomos, e mesmo da proxección do que seremos.

Disoncias xurdiu tras o proxecto dMudanza e fundaméntase nun proxecto de investigación, iniciado en 2019, cunha fase inicial teórica, e unha fase posterior práctica, na que se experimentou a través do encontro de diferentes colectivos, de diferente procedencia, fomentando o intercambio de vivencias e experiencias.

O resultado é, cando menos, sorprendente. Os achados nados dese encontro levan a reflexionar sobre a importancia das paisaxes sonoras e as súas diferenzas, e como foron evolucionando… case sen darnos conta.

Porque unha disonancia non é un ruído, senón algo que, simplemente, parece non encaixar. Ou si?